LAGUNA – Kinumpirma ng Majayjay Police na anim katao ang patay sa nangyaring salpukan ng isang bus at kotse sa Majayjay – Lucban road sakop ng Barangay Bakia, sa bayan ng Majayjay pasado alas-3:00 ng hapon noong Linggo.

Ayon kay PMAJ Jordan Aguilar, hepe ng Majayjay Police, apat ang dead on the spot habang dalawa ang idineklarang dead on arrival sa ospital sa Sta. Cruz, Laguna.

Nasa 80 naman ang iba pang mga nasugatan sa insidente kabilang ang isang batang sakay ng kotse.

Ayon sa imbestigasyon, ang mga namatay ay pawang mga pasahero ng bus na galing sa pilgrims sa simbahan sa Lucban.

Pabalik na sa Metro Manila ang bus at pababa sa kurbadang bahagi ng daan nang makasalpukan nito ang isang kotse na patungo naman sa direksyon ng Lucban.

Tumagilid ang ang kotse habang bumulusok ang bus at sumalpok sa malaking puno sa gilid ng kalsada at nawasak ang unahang kanang bahagi nito.

Nasa kustodiya na ng Majayjay Police ang driver ng bus na si Nelson Balanos. (NILOU DEL CARMEN)